ﷺ
نعت کہنے کے لئے لفظ نیا ڈھونڈیں گے
ہم بھی جامیؔ کی طرح رنگ جُدا ڈھونڈیں گے

اِن ستاروں سے بھری راہوں میں کیا رکھا ہے
نقشِ پائے شہِ انوارِ ہُدیٰ ڈھونڈیں گے

وہ تو صدیقؓ کی آنکھوں میں سمایا ہوا ہے
کس طرح اہلِ جفا نورِ خدا ڈھونڈیں گے

تاجِ شاہی بھی یہاں کاسہ بنا دیکھا ہے
تیری دہلیز کو سب شاہ و گدا ڈھونڈیں گے

نورِ بُرہانِ ہُدیٰ ، منزلِ ایقانِ خدا
ڈھونڈنے والے ترے قدموں میں جا ڈھونڈیں گے

جن کی خواہش ہے کھلے دل کی امیدوں کا چمن
گلشنِ طیبہ کی وہ لوگ فضا ڈھونڈیں گے

ہوں گے میزان پہ اعمال مگر کوثر پر
ہم ثنا گوئی کا عرفانؔ! صلہ ڈھونڈیں گے