ﷺ
کم نہیں تھا یہ خرابہ کسی ویرانے سے
’’دل کی دنیا میں بہار آئی ترےؐ آنے سے‘‘

جو رہا صدیوں تلک لات و ہُبل کا مسکن
آپؐ آئے تو بنا قبلہ وہ بت خانے سے

بزمِ عالم میں ہوئی شمعِ ہدایت روشن
مل گیا نورِ خدا اِس کی ضیا پانے سے

ورنہ عصیاں کی تپش ہم کو جلا ہی دیتی
مل گئی چھائوں شفاعت کی گھٹا چھانے سے

یوم میلاد منانے سے جو ناواقف ہیں
ہم کو احباب بھی لگتے ہیں وہ بیگانے سے

ہم کو ہر گام پہ یہ راستہ دکھلاتی ہے
خضرِ رہ مل گیا سنت تری اپنانے سے

آئے عرفانؔ جہاں میں وہ رئوف اور رحیم
جنؐ کو ملتی ہے خوشی غیر کا غم کھانے سے