ﷺ
دشت و صحرا میں بہار آئی ترےؐ آنے سے
ارضِ بطحا میں بہار آئی ترےؐ آنے سے

فاتحِ مکہ کی آمد سے ہی عالم بدلا
صحنِ کعبہ میں بہار آئی ترےؐ آنے سے

راہبِ وقت پلٹ آئے گھروں کی جانب
دین و دنیا میں بہار آئی ترےؐ آنے سے

قابلِ دید جہاں میں کوئی منظر ہی نہ تھا
چشمِ بینا میں بہار آئی ترےؐ آنے سے

غنچۂ جنبشِ لب کھِلنے سے قرآن ملا
باغِ اقرا میں بہار آئی ترےؐ آنے سے

نورِ توحید سے ہر سمت اُجالا پھیلا
حسنِ یکتا میں بہار آئی ترےؐ آنے سے

وادیِ جان بھی عرفانؔ! چمن زار ہوئی
’’دل کی دنیا میں بہار آئی ترےؐ آنے سے‘‘