ﷺ
کھل اُٹھا لالۂ صحرائی ، ترےؐ آنے سے
’’دل کی دنیا میں بہار آئی ترےؐ آنے سے‘‘

سر نگوں ہو گئی دارائی ترےؐ آنے سے
سرزمیں روم کی تھرَّائی ، ترےؐ آنے سے

تیرے آنے سے بجھا آتشکدۂ فارس
شرک کو ہو گئی پسپائی ، ترےؐ آنے سے

پھر خزاں آنے کا اِمکان ہی باقی نہ رہا
ہوئی ایسی چمن آرائی ، ترےؐ آنے سے

ایک مدت سے تھیں مشتاقِ زیارت آنکھیں
خوش ہوئی چشمِ تمنائی ، ترےؐ آنے سے

اہلِ ایمان کو ایماں پہ ملا اجرِ عظیم
کفر نے اپنی سزا پائی ترےؐ آنے سے

خار و خس ، کوہ و دمن ، دشت و بیاباں ، عرفانؔ
سب کی اُمید ہے بر آئی ، ترےؐ آنے سے