ﷺ
زندگی میں ترےؐ الطاف سنبھالے نہ گئے
قبر اور حشر میں بھی تیرےؐ حوالے نہ گئے

آگئے اپنے غلاموں کی بندھانے ڈھارس
ابھی اعمال بھی میزان پہ ڈالے نہ گئے

تب تلک وہؐ رہے منت کشِ الطافِ خدا
جب تلک سارے گنہگار بچا لے نہ گئے

ہجرِ طیبہ میں ، ترے شیدا بھی روتے ہی رہے
اشک جب تک اُنہیں طیبہ میں بہا لے نہ گئے

خلد میں بھی کوئے سرکارؐ کے متمنی ہیں
عشق والوں کے یہ انداز نرالے نہ گئے

اے قتادہؓ ! جو عطا دستِ یدُاللہ نے کی
تیری اُس آنکھ سے تا عُمر اُجالے نہ گئے

تب تلک شانِ سخاوت کو بھی آیا نہ قرار
جب تلک بھیک ترےؐ در سے گدا لے نہ گئے

رُک گئی نوکِ قلم عجز کے مارے آخر
تیرےؐ اوصاف جو الفاظ میں ڈھالے نہ گئے

سامنے آنکھوں کے عرفانؔ! جب آئے غم خوار
’’اشکِ غم دیدئہ پُر نم سے سنبھالے نہ گئے‘‘

رحمتِ کون و مکاں نے ہی سنبھالا آکر
جس گھڑی خود سے بھی عرفانؔ سنبھالے نہ گئے