ﷺ
زمیں سے عرش کی جانب سفر وہؐ کرتے گئے
غبارِ راہ کو رشکِ قمر وہؐ کرتے گئے

مری خطائوں سے صرفِ نظر وہؐ کرتے گئے
کرم کے کب تھا میں قابل مگر وہؐ کرتے گئے

جواب دیتے گئے چارہ گر زمانے کے
علاج و چارئہ زخمِ جگر وہؐ کرتے گئے

وہ جنؐ کی نسبتِ عالی پہ ناز ہے مجھ کو
مری کتابِ عمل معتبر وہؐ کرتے گئے

ورا زمان و مکاں سے ہے رحمتِ کونینؐ
کرم کی بارشیں آٹھوں پہر وہؐ کرتے گئے

لبوں پہ نورِ مجسمؐ کی نعت رکھتا ہوں
شبِ سیاہ کو نورِ سحر وہؐ کرتے گئے

کہاں کہاں ہے قدم رکھ کے چلنا دنیا میں
قدم قدم پہ جہاں کو خبر وہؐ کرتے گئے

شعاعِ مہرِ رسالت پڑی ہے جس جس پر
اُسی اُسی کو مثالِ گہر وہؐ کرتے گئے

یہ معجزئہ حبیبِ خداؐ ہے اے عرفانؔ!
ہوا ہے ِقبلہ اُدھر رُخ جدھر وہؐ کرتے گئے

کی عرض ؛ حرفِ ثنا کیجئے عطا آقاؐ!
نزول نعت کا عرفانؔ پر وہؐ کرتے گئے