ﷺ
گُن اُنؐ کے ہی گاتا ہے اپنا کہ بیگانہ ہے
’’اِک میں ہی نہیں اُن پر قربان زمانہ ہے‘‘

حامدؐ بھی وہ احمدؐ بھی ‘ محمودؐ و محمد ﷺ بھی
’’جو ربِ دو عالم کا محبوب یگانہ ہے‘‘

صد کیف کا عالم ہے اِک پل تیری مدحت کا
صد رشکِ گہر اُس پل آنکھوں کا بھر آنا ہے

بچپن سے ہی ہونٹوں پر سرکارؐ کی مدحت ہے
ٹوٹے نہ الٰہی یہ بندھن جو پُرانا ہے

جس ذاتؐ کی آمد پر کعبے پہ لگا جھنڈا
اُس ذاتؐ کی آمد پر راہوں کو سجانا ہے

مدحِ شہِؐ خوباں سے عرفاںؔ کی زباں تر ہے
شاہوں کے قصائد نہ گفتارِ زمانہ ہے