ﷺ
شہرِ طیبہ! تیری گلیوں کے نظاروں کو سلام
تیری گردِ راہ ‘ ذرّوں ‘ ریگزاروں کو سلام

اے مکینِ سبز گنبدؐ! تیری عظمت پر دُرُود
گنبدِ خضریٰ! ترے دلکش نظاروں کو سلام

دین کے ماتھے کا جھومر ہیں ابوبکرؓ و عمرؓ
چاند کے پہلو میں لیٹے دو ستاروں کو سلام

تیری گلیوں میں جو پھرتے ہیں گدا کے بھیس میں
اُن شہنشاہوں ، امیروں ، تاجداروں کو سلام

رشکِ ماہ و مہرِ تاباں ، نقشِ پائے مصطفیؐ
ہر قدم پر ملنے والے ماہ پاروں کو سلام

یہ جہانِ آب و گِل عرفاںؔ تھا صحرا کی طرح
آپؐ کے آنے سے آئی سب بہاروں کو سلام