"یہودی" عبرانی زبان کا لفظ ہے جس کے معنی "یہودا کے قبیلہ سے" کے ہیں۔ یہودیت کا شمار دنیا کے قدیم ترین مذاہب میں ہوتا ہے جس کی تاریخ تقریباً 1500 سے 2000 سال قبل مسیح بیان کی جاتی ہے۔ تاریخی اعتبار سے اسے الہامی مذاہب میں سب سے قدیم مذہب مانا جاتا ہے۔ عصر حاضر میں یہودیوں کی کل تعداد تقریباً 14.7 ملین ہے۔ زیر نظر کتاب اردو زبان میں یہودیت کا علمی تعارف ہے۔ کتاب آٹھ ابواب میں منقسم ہے۔ پہلے تین ابواب میں یہودیت کا تعارف، تاریخ اور مذہبی ارتقا کو مختصرا ً بیان کیا گیا ہے۔ چوتھے باب میں یہودی کتبِ مقدسہ اور مختلف مذہبی اصناف کا تعارف کروایا گیا ہے۔ پانچویں باب میں یہودی عقائد و عبادات پر بحث کی گئی ہے۔ چھٹے باب میں ایک مذہبی یہودی کی روز مرہ زندگی کا خاکہ اور تہذیب و ثقافت کا مختصر بیان شامل ہے۔ ساتواں باب یہودیت کے مشہور قدیم و جدید فرقوں و تحریکوں کا بیان ہے۔ آٹھویں باب میں یہودی روحانی نظام، جس میں تخلیق کائنات کا بیان بھی شامل ہے، کا تعارف کروایا گیا ہے۔ ہر باب کے آخر میں قارئین خصوصاً طلبا کی آسانی کے لیے مشقی سوالات موجود ہیں۔